ഊഴങ്ങൾക്ക് മുൻപ്

-തൻപുത്രനാം രാമൻ തന്നെ

ഗാഢമായാശ്ലേഷം ചെയ്താനന്ദാശ്രുക്കളോടും

പ്രൗഢാത്മാവായ വിധിനന്ദനോടും കൂടി

പുത്രന്മാരോടും പടയോടും ചെന്നയോദ്ധ്യയിൽ

സ്വസ്ഥമാനസനായി വാണീടിനാൻ കീർത്തിയോടെ

പരശുരാമനുമായി സന്ധിച്ച ശേഷം ആരെല്ലാം ആണ് ഇവിടെ ഓടിയത്?

സീതാപരിണയത്തിനു ശേഷം മടങ്ങുന്ന രാമദശരഥാദികളുമായി പരശുരാമൻ  സന്ധിച്ചശേഷം ഉള്ള  സംഭവം
പരശുരാമൻ 21 പ്രാവശ്യം ക്ഷത്രിയവംശത്തെ ഒക്കെ കൊന്നു മുടിച്ചവൻ

അപ്പൊ പിന്നെ ഇവരൊക്കെ ഓടിയില്ലെങ്കിലെ അത്ഭുതമുള്ളു അല്ലെ?

ഇത് മൂന്നാം ഊഴം  എന്റെ വഹ

അതവിടെ കിടക്കട്ടെ

രാമൻ വനവാസത്തിനു പോകുമ്പോൾ ഗംഗ നദി കടക്കുവാൻ ഗുഹന്റെ വഞ്ചിയിൽ കയറുന്ന ഒരു രംഗം അറിയാം അല്ലെ?

വഞ്ചിയുടെ കെട്ടൊക്കെ അഴിക്കാനായി ഗുഹൻ പോകുമ്പോൾ രാമൻ വഞ്ചിയിലേക്ക് കയറാൻ തുടങ്ങുന്നത് കണ്ട്  ഒളിമ്പിക്സ് നൂറു മീറ്റർ ഓട്ടക്കാരെക്കാൾ സ്പീഡിലല്ലെഗുഹൻ പാഞ്ഞു വന്നത്

എന്തിനാ?

രാമൻ വഞ്ചിയിൽ കാൽ വയ്ക്കാതിരിക്കാൻ. തടഞ്ഞു നിർത്തിയിട്ടു പറയുകാ

'പൊന്നെ ചതിക്കലെ. വയറ്റുപിഴപ്പ് മുട്ടിക്കല്ലെ'

രാമൻ നിന്നു. കാാര്യം അറിയില്ലല്ലൊ. സീതയും ലക്ഷ്മണനും വഞ്ചിയിലാണ്. താൻ മാത്രം എന്തു കൊണ്ട് കയറരുത് പോലും? ഏതായാലും കേരളമല്ലാത്തത് കൊണ്ടും കലിയുഗമല്ലാത്തത് കൊണ്ടും രാമൻ വേറെ രീതിയിൽ ഒന്നും ചിന്തിച്ചു കാണീല്ലായിരിക്കും

തുടർന്ന് ഗുഹൻ വഞ്ചിയിൽ കയറി. തന്റെ കൈകൾ വഞ്ചിയിൽ വച്ചു എന്നിട്ട് രാമനോട് പറഞ്ഞു.
"ഇനി ആ പാദങ്ങൾ എന്റെ കയ്യിലേക്ക് വച്ചോളൂ "

രാമൻ ആകെ  വിഷമത്തിലായി. ഗുഹൻ സഹപാഠി, സുഹൃത്ത് , നിഷാദരാജാവ്. അദ്ദേഹത്തിന്റെ കൈകളിലേക്ക് തന്റെ പാദങ്ങൾ വയ്ക്കണം പോലും.

പക്ഷെ അല്ലാതെ വഞ്ചിയിൽ കടക്കാൻ സമ്മതിക്കില്ല എന്ന് ഗുഹൻ

അവസാനം ഗുഹൻ പറഞ്ഞു അത്രെ.

അതെ പണ്ട് ഒരു കല്ലിൽ കൊണ്ട് കാൽ വച്ചു. അത് ഒരു പെണ്ണായി മാറി. ഇനി എന്റെ വഞ്ചി കൂടി ഒരുപെണ്ണാക്കിയാൽ  !!!!
വീട്ടിലേക്ക് പിന്നെ പോകാൻ പറ്റുമോ?

അത് കൊണ്ട് അപ്പണി വേണ്ടാ. എന്റെ വയറ്റുപിഴപ്പ് മുട്ടിക്കണ്ടാ. വേണമെങ്കിൽ കയ്യിലേക്ക് കാൽ വച്ച് കയറിക്കൊ

രാമൻ അനുസരിച്ചു

വഞ്ചി മറുകര എത്തി

ഇറങ്ങി യാത്രയാകുന്നതിൻ മുൻപ് സീതയുടെ കയ്യിൽ നിന്ന് മോതിരം ഊരി വാങ്ങി.
അത് ഗുഹൻ കൊടുക്കാൻ തുടങ്ങി- പ്രതിഫലം ആയി

ഗുഹന്റെ പ്രതികരണം

"അയ്യെ ഞാൻ തരക്കാരിൽ നിന്ന്  പ്രതിഫലം വാങ്ങാറില്ല. എന്നെക്കാൾ ഉയർന്ന നിലയിൽ ഉള്ളവരാണെങ്കിൽ പോട്ടെ സാരമില്ല വാങ്ങിയേക്കാം എന്ന് വയ്ക്കും. അത്രെ ഉള്ളൂ. രാമൻ പോയാട്ടെ"

രാമൻ - ആലോചിച്ചു തരക്കാരൊ ? ഞങ്ങൾ രണ്ടു പേരും തുല്യരോ ഇയാൾ എന്തൊക്കെയാണിപ്പറയുന്നത്?

പിന്നെ ചോദിച്ചു " അല്ല ഗുഹാ എങ്ങനെയാ നമ്മൾ തുല്യരായത്?"

ഗുഹൻ "അറിയില്ലെ? നമ്മൾ രണ്ടു പേരും കടത്തുകാരല്ലെ?  ഒരു കടത്തുകാരൻ മറ്റൊരു കടത്തുകാരനിൽ നിന്ന് പ്രതിഫലം വാങ്ങാൻ പാടുണ്ടോ?"

രാമൻ  "കടത്തുകാരൊ? നമ്മൾ രണ്ടുപേരും കടത്തുകാരൊ?  അതെങ്ങനെ?"

ഗുഹൻ " അത് ശരി അതുപോലും അറിയില്ല. ഞാൻ ഇവിടെ ഗംഗാനദി കടത്തി വിടൂന്നു. അങ്ങ് സംസാരസാഗരം കട ത്തുന്നു. അത്രയല്ലെ ഉള്ളു വ്യത്യാസം , സംഗതി രണ്ടും കടത്തു തന്നെ !!!!!

ഇത് രണ്ടാം ഊഴമൊന്നും അല്ല, ഊഴങ്ങൾക്ക് മുൻപ്

രാമരാജ്യം

വാല്‌മീകിരാമായണത്തിലെ രാമനെ കുറിച്ച്‌ ഒരു കുറിപ്പ്‌ എഴുതി.

അതു കണ്ടപ്പോള്‍ ഒരാള്‍ക്കു സംശയം തോന്നിയതു കണ്ടോ?

രാജഭരണമാണ്‌ ജനാധിപത്യത്തെക്കാള്‍ നല്ലത്‌ എന്ന് ഞാന്‍ പറഞ്ഞു.

അതെയോ? ഇനി ഞാന്‍ അങ്ങനെ എങ്ങാനും പറഞ്ഞോ പോലും?

സുഹൃത്തുക്കളേ - എഴുതിയതു വായിക്കുക അതില്‍ പറഞ്ഞതിന്റെ പൊരുള്‍ എന്താണെന്നു മനസ്സിലാക്കി വിമര്‍ശിക്കുക അതല്ലെ അഭികാമ്യം?

ക്ഷത്രിയന്റെ ഉദാഹരണത്തിന്‌ അനുയോജ്യമായ ഒരു കഥാപാത്രം ആണ്‌ വാല്‌മീകിയുടെ രാമന്‍ - ബ്രാഹ്മണന്റെ ഉദാഹരണത്തിന്‌ അനുയോജ്യനായ കഥാപാത്രം വിശ്വാമിത്രന്‍ എന്നതു പോലെ.

ഓരോരോ കാലഘട്ടത്തിനും അതിന്റെതായ കഥകള്‍ ഉണ്ടാകും. അന്നന്നത്തെ വ്യവസ്ഥിതിയ്ക്കനുസരിച്ച കഥകളായിരിക്കും അവ.

അന്നത്തെ പേരുകള്‍ ആയിരിക്കില്ല മറ്റൊരു കാലഘട്ടത്തില്‍ അതെ കഥാപാത്രങ്ങള്‍ക്ക്‌.

രാജ്യഭരണം നടത്തിയിരുന്നത്‌ അക്കാലത്ത്‌ രാജാക്കന്മാരായിരുന്നു. രാജാവാകണം എങ്കില്‍ ക്ഷത്രിയനായിരിക്കണം. അപ്പോള്‍ ക്ഷത്രിയന്‍ എങ്ങനെ ഉള്ളവനായിരിക്കണം എന്നതാണ്‌ രാമകഥയില്‍ കൂടി കാണിച്ചു തരുന്നത്‌.

ഇന്നു രാജ്യം ഭരിക്കുന്നത്‌ രഷ്ട്രീയക്കാരാണ്‌. തെരഞ്ഞെടുക്കപ്പെട്ട ജനപ്രതിനിധികള്‍. ഈ പ്രതിനിധിയ്ക്കു വേണ്ട ഗുണങ്ങളും ഇതുപ്പോലെ തന്നെ വായിച്ചെടുക്കണം.

രാമന്റെ ഗുണം ആണ്‌ ideal ഓരോ ജനപ്രതിനിധിയും രാമഗുണം ഉള്ളവനാണെങ്കില്‍ രാമരാജ്യം വരും -

കളിയാക്കിപ്പറഞ്ഞതാണെങ്കിലും ശ്രീഹരിയ്ക്ക്‌ - (cALviN::കാല്‍‌വിന്‍) കാര്യമറിയാം

രാമരാജ്യം എങ്ങനെ ആയിരിക്കും എന്നു വാല്‌മീകി പറഞ്ഞതു കേള്‍ക്കണ്ടേ? അതു കേട്ടിട്ട്‌ നമുക്കൊരുമിച്ച്‌ ഹാലിളക്കാം പോരേ?

"പ്രഹൃഷ്ടമുദിതോ ലോകസ്തുഷ്ടഃ പുഷ്ടഃ സുധാര്‍മ്മികഃ
നിരാമയോ ഹ്യരോഗശ്ച ദുര്‍ഭിക്ഷഭയവര്‍ജ്ജിതഃ"

ജനങ്ങള്‍ എല്ലാവരും - പ്രജകള്‍ എല്ലാവരും -- ശ്രദ്ധിക്കണം എല്ലാവരും ആണ്‌ സവര്‍ണ്ണര്‍ മാത്രമല്ല ബ്രാഹ്മണര്‍ മാത്രമല്ല ക്ഷത്രിയര്‍ മാത്രമല്ല, വൈശ്യര്‍ മാത്രമല്ല ----- എല്ലാവരും അതുകൊണ്ടാണ്‌ ലോകം എന്ന വാക്കുപയോഗിച്ചിരിക്കുന്നത്‌ സന്തുഷ്ടരാണ്‌ , ധാര്‍മ്മികബുദ്ധിയുള്ളവരാണ്‌, രോഗങ്ങള്‍ വ്യാധികള്‍ എന്നിവയില്ലാത്തവരാണ്‌, ക്ഷാമം, ഭയം , എന്നിവയില്ലാത്തവരാണ്‌.

(എന്താ ഇതൊക്കെ ആണൊ മോശം സംഗതികള്‍ അതോ ഇതില്‍ പറഞ്ഞ - ഇല്ലാത്തവയെല്ലാം ഉണ്ടായിരിക്കയും ഉള്ളവയെല്ലാം ഇല്ലാതിരിക്കുകയും വേണോ?)

ന പുത്രമരണം കേചിത്‌ ദ്രക്ഷ്യന്തി പുരുഷാഃ ക്വചിത്‌
നാര്യശ്ചാവിധവാ നിത്യം ഭവിഷ്യന്തി പതിവ്രതാഃ

പുത്രമരണം, വൈധവ്യം എന്നിവ കേള്‍ക്കാനില്ല, പാതിവ്രത്യം ഉണ്ടായിരുന്നു.

ന ചാഗ്നിജം ഭയം കിഞ്ചിന്നാപ്സു മജ്ജന്തി ജന്തവഃ
നവാതജം ഭയം കിഞ്ചിന്നാപി ജ്വരകൃതം തഥാ

അഗ്നി ജലം വായു എന്നിവയില്‍ നിന്നുള്ള ഭയം ഉണ്ടായിരുന്നില്ല - പ്രകൃതി പോലും അനുകൂലമാണെന്നു താല്‍പര്യം. രോഗഭയവും ഇല്ലായിരുന്നു.

"നചാപി ക്ഷുത്ഭയം തത്ര ന തസ്കരഭയം തഥാ
നഗരാണി ച രാഷ്ട്രാണി ധനധാന്യയുതാനി ച
നിത്യം പ്രമുദിതാഃ സര്‍വേ യഥാ കൃതയുഗേ തഥാ"

വിശപ്പില്‍ നിന്നോ കള്ളന്മാരില്‍ നിന്നോ ഉള്ള ഭയവും അക്കാലത്തില്ലായിരുന്നു. രാജ്യം ധനധാന്യസമ്പല്‍ സമൃദ്ധമായിരുന്നു.
എല്ലാവരും എല്ലായ്പ്പോഴും സന്തുഷ്ടരായിരുന്നു.

ഇതു പോലെ ഒരു ഭരണം ആണ്‌ കാഴ്ച വയ്ക്കുന്നതെങ്കില്‍ അത്‌ കോണ്‍ഗ്രസ്സായാലും, കമ്യൂണിസ്റ്റായാലും ബി ജെ പി ആയാലും ഇനി മറ്റാരെങ്കിലും ആയാലും അതു നല്ലത്‌


അല്ല ഇന്നു കാണുന്നതുപോലെ സ്വജനപക്ഷപാതം, കൊള്ള, കൊല, കൈക്കൂലി, ഗുണ്ഡാരാജ്‌ എന്നിവയാണു കാണുന്നതെങ്കില്‍ അത്‌ ഏതു ശ്രീരാമനാണെങ്കിലും ശ്രീകൃഷ്ണനാണെങ്കിലും എതിര്‍ക്കണം.


അപ്പോള്‍ വാല്‌മീകിയാമായണം ഒന്നു വായിക്കൂ രാമരാജ്യം എന്താണെന്നു മനസ്സിലാക്കിയശേഷം നമുക്കു ചര്‍ച്ചിക്കാം -- രാമരാജ്യം വേണോ വേണ്ടയൊ എന്ന്